სოხუმის სახელმწიფო უნივერსიტეტის სამართლისა და დიპლომატიის ფაკულტეტზე, აშშ-ს ფლორიდის შტატის მოსამართლემ, პროფესორმა მარკ სპეისერმა და ადვოკატმა, პროფესორმა რობერტ ტრაჩმანმა საჯარო ლექცია ინგლისურ ენაზე წაიკითხეს. ქართული თარგმანი უზრუნველყო რექტორის თანაშემწემ, სამართლისა და დიპლომატიის ფაკულტეტის მაგისტრატურის სტუდენტმა, გიორგი რურუამ.
შეხვედრის ორგანიზატორები იყვნენ ასოც. პროფესორი პაატა დავითაია, სამართლისა და დიპლომატიის ფაკულტეტის დეკანი, პროფ. ვეფხვია გვარამია და ფაკულტეტის ადმინისტრაცია.
მომავალ იურისტებს პირველად სტუმრობდა ცნობილი ადვოკატი, პროფესორი რობერტ ტრაჩმანი, რომელიც აშშ-ში ხანგრძლივი პერიოდის განმავლობში პროკურორის თანამდებობას იკავებდა, დღეს კი საადვოკატო ოფისის ხელმძღვანელია და განსხვავებული კატეგორიის სუბიექტების ინტერესების დაცვითაა დაკავებული, როგორც საჯარო სამსახურებში, ისე სასამართლოში.
პროფესორმა რობერტ ტრაჩმანმა ისაუბრა აშშ-ში ადვოკატის ფუნქციებსა და საკანონმდებლო სისტემაზე, კანონმდებლობის ევოლუციური განვითარების თავისებურებებზე და ხაზგასმით აღნიშნა, რომ კანონმდებლობის ცვლილება და განვითარება საზოგადოების განვითარების შესაბამისად ხორციელდება. ამის საილუსტრაციოდ მან პრაქტიკული მაგალითები გაანალიზა და დასძინა, რომ საქართველოშიც მიმდინარეობს ანალოგიური პროცესი. მაგ. ნაფიც მსაჯულთა მონაწილეობით საქმის განხილვის გათვალისწინება კანონმდებლობაში.
მოსამართლე მარკ სპეისერმა საჯარო ლექცია დაუთმო აშშ-ს სასამართლო სისტემას, მოსამართლეთა არჩევის და დანიშვნის წესს, მათ ფუქციებს, გადაწყვეტილების მიღებას და სასჯელის დანიშვნის თავისებურებებს. ყურადღება გაამახვილა განაჩენის გამოტანის დროს მოსამართლისა და ნაფიცი მსაჯულების ფუნქციათა გამიჯვნის საკითხზე.
ლექციის მიმდინარეობის დროს კითხვა-პასუხის რეჟიმში აქტიურად იყვნენ ჩართული სტუდენტები და პროფესორ-მასწავლებლები. პროფესორმა
რობერტ ტრაჩმანმა და მოსამართლე მარკ სპენსერმა ამომწურავად უპასუხეს დასმულ შეკითხვებს.