2023 წლის 1 ნოემბერს, სოხუმის სახელმწიფო უნივერსიტეტში, საქართველოს
ცენტრალური საარჩევნო კომისიის წარმომადგენლებმა საარჩევნო რეფორმებთან დაკავშირებული
პრეზენტაცია ჩაატარეს.
პრეზენტაციას უძღვებოდა ცენტრალური საარჩევნო კომისიის, საარჩევნო პროცესების
მართვის დეპარტამენტის, საარჩევნო კომისიების მართვის განყოფილების უფროსი - რევაზ
ეგაძე.
ბატონმა რეზომ, სოხუმის სახელმწიფო უნივერსიტეტის სტუდენტებს გაუზიარა, ელექტრონული ტექნოლოგიების გამოყენებით, საპილოტე
რეჟიმში ჩატარებული არჩევნების გამოცდილება და აღნიშნა: -„იმისათვის, რომ ელექტრონულ
ტექნოლოგიებზე გადასვლა მოხდეს უპრობლემოდ, აუცილებელია ამომრჩეველი დეტალურად იყოს
ინფორმირებული ამ პროცესის შესახებ. ამომრჩეველი ინფორმირებული უნდა იყოს აპარატების
უპირატესობების, უსაფრთხოებისა და ფუნქციონირების
თაობაზე.”
პრეზენტაციის შემდეგი ეტაპი კითხვა-პასუხის რეჟიმში წარიმართა. ცესკო-ს
წარმომადგენლებმა სტუდენტთა შეკითხვებს ამომწურავი პასუხები გასცეს.
სტუდენტების დიდი ინტერესი გამოიწვია იმიტირებულმა საარჩევნო პროცესმა.
ცესკო-ს წარმომადგენლებმა მათ, საარჩევნო უბანზე,
ელექტრონული ტექნოლოგიების გამოყენებით განსახორციელებელი ყველა პროცედურა დაწვრილებით
გააცნეს, რის შემდეგაც მონაწილეებს საინფორმაციო ფლაერები დაურიგდათ.
ღონისძიება ორგანიზებული იყო სოხუმის სახელმწიფო უნივერსიტეტის საზოგადოებასა
და მედიასთან ურთიერთობის სამსახურის მიერ.