სოხუმის სახელმწიფო უნივერსიტეტის ადმინისტრაცია, აკადემიური საზოგადოება და სტუდენტები ღრმა მწუხარებით იუწყებიან, რომ გარდაიცვალა განათლების დოქტორი, სოხუმის სახელმწიფო უნივერსიტეტის განათლების მეცნიერებათა ფაკულტეტის პროფესორი ლელა რეხვიაშვილი.
ლელა რეხვიაშვილი აფხაზეთში, ტყვარჩელში დაიბადა, საშუალო სკოლის დამთავრების შემდეგ სწავლობდა სოხუმის დიმიტრი არაყიშვილის სახელობის სახელმწიფო მუსიკალურ სასწავლებელში, რომლის დამთავრების შემდეგ, სწავლა გააგრძელა კიევის კორნრიჩუკის სახელობის სახელმწიფო კულტურის ინსტიტუტში, სადაც კულტურის მუშაკისა და აკადემიური გუნდის დირიჟორის კვალიფიკაცია მიიღო. მალე ლელა რეხვიაშვილმა სწავლა ასპირანტურაში გააგრძელა და ივ. ჯავახიშვილის სახელობის თბილისის სახელმწიფო უნივერსიტეტის დიდი საბჭოს 1992 წლის 4 თებერვლის N1 ოქმის საფუძველზე მიენიჭა პედაგოგიურ მეცნიერებათა კანდიდატის ხარისხი, ხოლო 2006 წლიდან არის განათლების დოქტორი.
ლელა რეხვიაშვილი 1982 წლიდან მუშაობდა სხვადასხვა საგანმანათლებლო დაწესებულებაში - ჯერ მუსიკის მასწავლებლად სკოლაში, პარალელურად აფხაზეთის ა.მ. გორკის სახელობის სახელმწიფო უნივერსიტეტში, 1989 წელს მისი გაყოფის შემდეგ და დევნილობისას ივანე ჯავახიშვილის სახელობის თბილისის სახელმწიფო უნივერსიტეტის სოხუმის ფილიალში, სადაც 2006 წლამდე დოცენტის თანამდებობა ეკავა. ლელა რეხვიაშვილის მრავალწლიანი პროფესიული და სამეცნიერო საქმიანობა უკავშირდება როგორც პედაგოგიკისა და ხელოვნების, ისე განათლების მეცნიერებების, კერძოდ, ინკლუზიური მიდგომების შესწავლის განვითარებისა და გავრცელების საქმეს. 2013 წლიდან ლელა რეხვიაშვილი იყო სოხუმის სახელმწიფო უნივერსიტეტის განათლების მეცნიერებათა ფაკულტეტის ასისტენტ პროფესორი და უნივერსიტეტის წარმომადგენლობით საბჭოს (სენატის) ორი მოწვევის წევრი.
ლელა რეხვიაშვილს მეცნიერულ-პედაგოგიური მოღვაწეობის განმავლობაში გამოცემული აქვს 30-მდე სამეცნიერო ნაშრომი, მათ შორის სამი მონოგრაფია, მონაწილეობა მიღებული აქვს 20-ზე მეტ ეროვნულ და საერთაშორისო სამეცნიერო კონფერენციაში, მათ შორის Erasmus+ პროექტების ფარგლებში. მისი კვლევითი ინტერესები განათლების ისტორიას, ინკლუზიურ განათლებას, ზნეობრივ აღზრდას, არტპედაგოგიკას, არტთერაპიასა და თანამედროვე სასწავლო მეთოდებს მოიცავდა. ბოლო წლებში საინტერესო წამოწყება ჰქონდა არტპედაგოგიკის მიმართულებით, 2018 წელს შექმნა ახალი სასწავლო კურსი და სპეციალური სასწავლო სალექციო კურსი, რომლის გამოცემა, სამწუხაროდ, ვერ მოასწრო.
ლელა რეხვიაშვილი გამოირჩეოდა მაღალი პროფესიონალიზმით, საქმისადმი თავდადებული დამოკიდებულებითა და პედაგოგიური კულტურით. იგი, წლების მანძილზე, ღირსეულად ემსახურებოდა მომავალ მასწავლებელთა პროფესიული კადრების აღზრდისა და პედაგოგიური მეცნიერების
განვითარების საქმეს.
სოხუმის სახელმწიფო უნივერსიტეტის ადმინისტრაცია, აკადემიური პერსონალი და სტუდენტები ღრმა მწუხარებას გამოთქვამენ ლელა რეხვიაშვილის გარდაცვალების გამო და თანაგრძნობას უცხადებენ განსვენებულის ოჯახს, კოლეგებს, სტუდენტებსა და მეგობრებს.
ლელა რეხვიაშვილის პროფესიონალიზმი და კეთილი სახელი სამუდამოდ დარჩება სოხუმის სახელმწიფო უნივერსიტეტის ისტორიაში!