2023 წლის 6-8 ივლისს ქ. ბათუმში
ჩატარდა მე-2 საერთაშორისო
სამეცნიერო კონფერენცია „ბიოპოლიმერების
ქიმიური და ტექნოლოგიური ასპექტები“.
კონფერენციის ორგანიზატორები არიან: სოხუმის სახელმწიფო
უნივერსიტეტი, თბილისის ივანე ჯავახიშვილის სახელმწიფო უნივერსიტეტი, ბათუმის შოთა
რუსთაველის სახელმწიფო უნივერსიტეტი. ISC CHTAB 2023 კონფერენციას მასპინძლობა გაუწია ბათუმის შოთა რუსთაველის
სახელმწიფო უნივერსიტეტის ტექნოლოგიურმა ფაკულტეტმა.
კონფერენციების მიზანია კვლევის შედეგების წარმოდგენა
მნიშვნელოვან საკვანძო საკითხებზე ბიოპოლიმერების სინთეზისა და გამოყენების თვალსაზრისით,
რაც სტრატეგიულად მნიშვნელოვანი და მოთხოვნადია ქიმიური, საკვები, ფარმაცევტული და
სხვ. ინდუსტრიაში და რამდენიმე სამეცნიერო სფეროს (ბიოლოგია, ქიმია, ტოქსიკოლოგია,
ნანოტექნოლოგია, ბიოტექნოლოგია, ბიომედიცინა) გადაკვეთას წარმოადგენს.
საერთაშორისო სამეცნიერო კონფერენციაზე - ISC CHTAB 2023, ქართველმა და უცხოელმა მეცნიერებმა: პოლონეთიდან
(გდანსკი), ყაზახეთიდან (ალმატი) წარმოადგინეს სამეცნიერო ნაშრომები თანამედროვე ბიოორგანული
ქიმიის მიღწევებზე; აგრარულ და მემბრანულ ტექნოლოგიებზე; მცირენარჩენიან, მაღალპროდუქციულ ინოვაციურ ტექნოლოგიებზე;
ბიომასალებსა და ბიონანომასალებზე; ბუნებრივი წარმოშობის ბიოდეგრარირებად
პოლიმერებზე; სასურსათო და გარემოს დაცვით საკითხებზე.
ISC CHTAB 2023 კონფერენციას დიდი გამოხმაურება
მოჰყვა. კონფერენციაში ჩართული იყო სულ 242 მონაწილე, ესენია როგორც საქართველოში
არსებული უნივერსიტეტების და სამეცნიერო კვლევითი ინსტიტუტების ქართველი მეცნიერები,
ისე საზღვარგარეთის საერთაშორისო უნივერსიტეტების უცხოელი კოლეგები, ახალგაზრდები.
ყოველივე ძალიან მნიშვნელოვანია, რადგან ასეთი ჩართულობა
ხელს შეუწყობს ადგილობრივი კვლევების საერთაშორისო კვლევებთან ინტეგრაციას.
ამ მხრივ განსაკუთრებით აღსანიშნავია კონფერენციის
თემატიკით ქართველი და უცხოელი კოლეგების მიერ შესრულებული ერთობლივი
სამეცნიერო-კვლევითი სამუშაოები, რაც წარმოდგენილია ISC CHTAB 2023 კონფერენციის
მასალებში. მათ შორისაა: საქართველოში ქიმიის და მოლეკულური ინჟინერიის ინსტიტუტის
მეცნიერ-მკვლევარებისა და ესპანეთის უნივერსიტეტების ქიმიური ინჟინერიის
მკვლევარების მიერ ერთობლივად განხორციელებული, სამედიცინო თვალსაზრისით გამოყენებული
- α-ამინმჟავებისაგან დამზადებული ფსევდოპროტეინული ნანონაწილაკები - ხელოვნური
ბიოდეგრარირებადი პოლიმერები;
ასევე, ქართველი და იტალიელი მეცნიერ-მკვლევრების:
თსუ-ს ფიზიკური და ანალიზური ქიმიის ინსტიტუტის და მილანის უნივერსიტეტის
მასალებისა და ქიმიური ინჟინერიის დეპარტამენტის მკვლევრების მიერ ენანტიომერების
კვლევებში თხევად ქრომატოგრაფიაში გამოყენებული, პოლისაქარიდებზე დაფუძნებული
ქირალურ სვეტებზე შესრულებული ერთობლივი სამუშაოები;
აღსანიშნავია, ასევე იოველ ქუთათელაძის
ფარმაკოქიმიის ინსტიტუტისა და ჟენევის ფარმაცევტული მეცნიერებათა სკოლის
მეცნიერ-მკვლევარების მიერ შესრულებული ერთობლივი სამეცნიერო კვლევები -
ბუნებრივი, ანთების საწინააღმდეგო ნაერთებისთვის ნანოლიპოსომური წამლის მიწოდების
სისტემის შემუშავებაზე.
კონფერენციის ძირითადი შედეგები ასახულია კრებულში
„ISC CHTAB 2023“, რომელიც უკვე გამოიცა.
აღნიშნული კონფერენცია საქართველოში ტარდება უკვე
მეორედ. პირველი
საერთაშორისო სამეცნიერო კონფერენცია „ბიოპოლიმერების ქიმიური და ტექნოლოგიური
ასპექტები“ ჩატარდა 2020 წლის 20-21 ოქტომბერს ონლაინ ფორმატში. კონფერენციას ექნება სისტემური ხასიათი და რიგით მე-3 კონფერენცია „ბიოპოლიმერების ქიმიური და
ტექნოლოგიური ასპექტები“ 2026 წელს ჩატარდება.
