სოხუმის სახელმწიფო უნივერსიტეტში მან-სან-კანის შიდა ჩემპიონატის ნახევარფინალი გაიმართა

სოხუმის სახელმწიფო უნივერსიტეტში გაიმართა მან-სან-კანის შიდა ჩემპიონატის ნახევარფინალი, სადაც ერთმანეთს სკეჩებითა და იუმორისტული ნომრებით დაუპირისპირდნენ სხვადასხვა ფაკულტეტის სტუდენტური გუნდები.

ნახევარფინალს აფასებდა პროფესიონალი ჟიური:

სოხუმის სახელმწიფო უნივერსიტეტის რექტორი, პროფესორი და ყოფილი მანსანკანელი - ქალბატონი თეა ჯუღელი;

უნივერსიტეტის პირველი „მანი-სანის“ გუნდის რეჟისორი და გადაცემა „სპორტ შოუს“ ავტორი - მიხეილ აბრამიშვილი;

სოხუმის უნივერსიტეტის მანსანკანის პირველი გუნდის კაპიტანი და კინო გახმოვანების ცნობილი სპეციალისტი - ლაშა ბახტაძე;

სპორტის, კულტურისა და ახალგაზრდულ საქმეთა სამსახურის უფროსი - გიორგი კუპატაძე.

შიდა ჩემპიონატის ორგანიზება უზრუნველყვეს უნივერსიტეტის მხიარულთა და საზრიანთა გუნდის რეჟისორმა - თენგიზ შუკაკიძემ და გუნდი „სოხუმარების“ წევრებმა.

ცნობილია, რომ სოხუმის სახელმწიფო უნივერსიტეტის გუნდი „სოხუმარები“ წარმატებით ასპარეზობს საქართველოს მან-სან-კანის ჩემპიონატ „ქართულ ლიგაში“, რამაც უნივერსიტეტში შიდა თამაშებზე ინტერესი განსაკუთრებით გაზარდა.

შიდა ჩემპიონატი სამ ტურად ტარდება. ფინალურ ეტაპზე გამარჯვებულებს ფულადი პრიზები და გარდამავალი თასი ელოდებათ.

წარმატებებს ვუსურვებთ ნახევარფინალის ყველა მონაწილეს!