2020 წლის 3, 4
და 6 ივლისს სოხუმის სახელმწიფო უნივერსიტეტის
ინიციატივით მაგისტრანტთა და სტუდენტთა ტრადიციული ეროვნული სამეცნიერო
კონფერენცია „ჟამთააღმწერელი
2020“ მეექვსედ გაიმართა. სოხუმის სახელმწიფო უნივერსიტეტის
სტუდენტებთან ერთად კონფერენციის მუშაობაში
მონაწილეობდნენ კავკასიის უნივერსიტეტის, ივ. ჯავახიშვილის სახელობის თბილისის
სახელმწიფო უნივერსიტეტისა და საქართველოს საპატრიარქოს წმინდა ანდრია პირველწოდებულის
ქართული უნივერსიტეტის სტუდენტები.
კონფერენცია გახსნა
სოხუმის სახელმწიფო უნივერსიტეტის რექტორმა, პროფ. ზურაბ ხონელიძემ, რომელმაც სამეცნიერო
კვლევებში სტუდენტთა ჩართულობის მნიშვნელობასა და უნივერსიტეტში ამ თვალსაზრისით დაგეგმილ
სიახლეებზე ისაუბრა. კონფერენციის მონაწილე სტუდენტებსა და აკადემიურ პერსონალს
მიესალმნენ: ადმინისტრაციის ხელმძღვანელი,
ასოც. პროფ. ნინო თოფურიძე, პროფესორი ზურაბ პაპასქირი, სამეცნიერო კვლევებისა
და განვითარების დეპარტამენტის უფროსი, ასოც. პროფ. ლია ახალაძე, განათლების მეცნიერებათა
ფაკულტეტის დეკანი, ასოც. პროფ. თამარ შინჯიაშვილი, საზოგადოებასთან ურთიერთობების
სამსახურის უფროსი ასოც. პროფ. კახა კვაშილავა, კავკასიის უნივერსიტეტის პროფესორი
გურანდა ჭელიძე, ევროპის უნივერსიტეტის პროფესორი თამარ ფხალაძე, სსუ ასოც. პროფესორი
იზოლდა ბუხულეიშვილი. სტუდენტები: სალომე გოგია, თინათინ კოდუა და ქეთევან ბაღდავაძე.
სამი დღის მანძილზე,
პლენარულ, ისტორიისა და საზოგადოებრივი მეცნიერებებისა და განათლების მეცნიერებებათა
სექციებზე ოთხი უნივერსიტეტის 31 სტუდენტის 28 მოხსენება იქნა მოსმენილი. მოხენებათა დიდი ნაწილი ინტერდისციპლინარულ
კვლევებს მიეკუთვნებოდა. მიუხედავად იმისა, რომ კონფერენცია ონლაინ რეჟიმში Zoom -ის პლატფორმაზე
გაიმართა, სტუდენტთა ინტერესმა, წარმოედგინათ საკუთარი დაკვირვებები, მოესმინათ მეგობრებისთვის
ან ჩართულიყვნენ დისკუსიაში, მოლოდინს გადააჭარბა. შემაჯამებელ სხდომაზე გადაწყდა წარმოდგენილი
მოხსენებების საუკეთესო ნაწილი, მეცნიერ - ხელმძღვანელთა შესაბამისი რეცენზირების
შემდეგ, დაიბეჭდოს სტუდენტურ კრებულში
და განთავსდეს უნივერსიტეტის ვებ-გვერდზე.
კონფერენციის მუშაობას
მაღალი შეფასება მისცა კავკასიის უნივერსიტეტის პროფესორმა გურანდა ჭელიძემ, რომელმაც
მადლობა გადაუხადა კოლეგებს თანამშრომლობისთვის და აღნიშნა, რომ მსგავსი ღონისძიებები
ზრდის სტუდენტთა მოტივაციას, როგორც სასწავლო პროცესში ჩართულობის, ასევე სამეცნიერო-კვლევითი
უნარ-ჩვევების ჩამოყალიბების თვალსაზრისით. თავის მხრივ, უნივერსიტეტის რექტორმა და სამეცნიერო კვლევებისა
და განვითარების დეპარტამენტის უფროსმა მადლობა გადაუხადეს კონფერენციის მონაწილე უნივერსიტეტებს,
სტუდენტებსა და მათ მეცნიერ-ხელმძღვანელებს,
მთელი მსოფლიოს წინაშე არნახული გამოწვევების ვითარებაში, აქტიური სამეცნიერო ჩართულობისა
და მოტივაციისთვის.
კონფერენციის ორგანიზატორები: სსუ სამეცნიერო
კვლევებისა და განვითარების დეპარტამენტი, განათლების მეცნიერებათა ფაკულტეტი, მულტიკულტურული
განათლებისა და კულტურის კვლევების ცენტრი.
იხილეთ კონფერენციის პროგრამა.
