2023 წლის 27 სექტემბერს, სოხუმის სახელმწიფო უნივერსიტეტის რექტორმა პროფ. ზურაბ ხონელიძემ და უნივერსიტეტის პროფესორებმა, რომლებიც ბათუმში ევროკავშირის პროექტის DITEC-ის საერთაშორისო კონფერენციაში მონაწილეობნენ, ორგანიზაცია „ქართულ-აფხაზურ საგასთან“ და ქალთა საერთაშორისო ორგანიზაცია სოროპტიმისტ ინტერნაციონალის კლუბთან ერთად სოხუმის დამცველ მეომრებს პატივი მიაგეს.
შეკრებილებს სიტყვით მიმართა „ქართულ-აფხაზური საგას“ და ქალთა საერთაშორისო ორგანიზაცია სოროპტიმისტ ინტერნაციონალის კლუბის დამფუძნებელმა, ცნობილმა საზოგადო მოღვაწემ ქალბატონმა ნათელა დუმბაძემ, სოხუმის სახელმწიფო უნივერსიტეტის რექტორმა პროფ. ზურაბ ხონელიძემ, საქართველოს მეცნიერებათა ეროვნული აკადემიის აკადემიკოსმა, აჭარის რეგიონული სამეცნიერო ცენტრის ხელმძღვანელმა პროფესორმა ვანო პაპუნიძემ, ცნობილმა აფხაზმა მწერალმა, პოლიტიკოსმა, ჟურნალისტმა და საზოგადო მოღვაწემ ანზორ კუდბამ და სხვებმა. გამომსვლელებმა ისაუბრეს ქართულ-აფხაზური ურთიერთობების თანამედროვე მდგომარეობაზე და ხაზი გაუსვეს საქართველოს ერთიანობის გეოპოლიტიკურ და ისტორიულ მნიშვნელობას სამხრეთ კავკასიის რეგიონსა და მსოფლიოში. ღონისძიების მონაწილეებმა დაღუპულ მეომართა პატივსაცემად სიმბოლურად ზღვაში გვირგვინები ჩაუშვეს.