2026 წლის 6–7 ნოემბერს
სოხუმის სახელმწიფო
უნივერსიტეტმა და
აფხაზეთის ავტონომიური
რესპუბლიკის უმაღლესმა
საბჭომ ერთობლივად
გამართეს საერთაშორისო
სამეცნიერო სიმპოზიუმი,
რომელიც მიეძღვნა საქართველოში
ქრისტიანობის სახელმწიფო
რელიგიად გამოცხადების
1700 წლისთავს. სიმპოზიუმში
მონაწილეობდა 130-ზე მეტი
მომხსენებელი საქართველოდან და უცხოეთიდან.
6 ნოემბერს, უნივერსიტეტის მეორე სასწავლო კორპუსის
სააქტო დარბაზში,
სიმპოზიუმი გახსნა სოხუმის სახელმწიფო
უნივერსიტეტის რექტორმა,
პროფესორმა თეა
ჯუღელმა. მონაწილეებს
მიესალმნენ მანგლისისა
და თეთრიწყაროს
მიტროპოლიტი ანანია
(ჯაფარიძე), ჭყონდიდის,
ცაგერისა და
ლენტეხის მიტროპოლიტი
სტეფანე (კალაიჯიშვილი),
აფხაზეთის ავტონომიური
რესპუბლიკის უმაღლესი
საბჭოს თავმჯდომარე
ჯემალ გამახარია
და აფხაზეთის
ავტონომიური რესპუბლიკის
იძულებით გადაადგილებულ პირთა მინისტრი დავით
ფაცაცია.
ორდღიანი სიმპოზიუმის
პროგრამა ცხრა
თემატურ სესიას
მოიცავდა. მკვლევრებმა
განიხილეს ქრისტიანობის
როლი საქართველოს
ისტორიაში, კულტურასა
და საზოგადოებრივ ცხოვრებაში. პირველ დღეს
თემატური სესიები
გაიმართა უნივერსიტეტის ორივე სასწავლო კორპუსში.
მომხსენებლები სესიებში
მონაწილეობდნენ როგორც
ადგილზე, ისე
ონლაინ. 7 ნოემბერს
სიმპოზიუმის მუშაობა
გაგრძელდა განათლების
მეცნიერებათა სესიით, რომელსაც უნივერსიტეტის პირველმა სასწავლო კორპუსმა
უმასპინძლა.
ორდღიანმა სიმპოზიუმმა
ქართველ და
უცხოელ მკვლევრებს
შესაძლებლობა მისცა,
ერთმანეთისთვის კვლევის
შედეგები გაეზიარებინათ და სხვადასხვა დარგის
პერსპექტივიდან განეხილათ,
როგორ აისახა
ქრისტიანობის სახელმწიფო
რელიგიად გამოცხადება
საქართველოს ისტორიაზე,
კულტურასა და
განათლებაზე.