2026 წლის 20 აპრილს, თბილისში, სოხუმის სახელმწიფო უნივერსიტეტში, ივანე ჯავახიშვილის 150 წლისთავისადმი მიძღვნილი საიუბილეო სემინარი გაიმართა. ღონისძიება უნივერსიტეტის სამეცნიერო კვლევებისა და განვითარების დეპარტამენტის ორგანიზებით ჩატარდა პოლიტკოვსკაიას ქუჩა N61-ში, 712-ე აუდიტორიაში, ზვიად გამსახურდიას სახელობის საკონფერენციო დარბაზში.
სემინარის გახსნისას დამსწრე საზოგადოებას მისასალმებელი სიტყვით მიმართა სოხუმის სახელმწიფო უნივერსიტეტის ასოცირებულმა პროფესორმა და რექტორის მოადგილემ, რომეო გალდავამ. ღონისძიებაში მონაწილეობდნენ ასევე სსუ-ის ჰუმანიტარულ მეცნიერებათა ფაკულტეტის დეკანი მარინა ტურავა და ამავე ფაკულტეტის პროფესორი ზურაბ პაპასქირი.
სემინარს მოდერაციას უწევდა პროფესორი ზურაბ პაპასქირი. პროგრამის ფარგლებში წარმოდგენილი იყო ორი მოხსენება, რომლებიც ივანე ჯავახიშვილის სამეცნიერო და საზოგადოებრივ მემკვიდრეობას შეეხებოდა.
პროფესორმა ლია ახალაძემ წარადგინა მოხსენება თემაზე - „ივანე ჯავახიშვილი თანამედროვე ქართული ისტორიული სკოლისა და პირველი ქართული უნივერსიტეტის ფუძემდებელი“. მოხსენებაში ყურადღება გამახვილდა ივანე ჯავახიშვილის როლზე ქართული ისტორიოგრაფიის განვითარებისა და ეროვნული უმაღლესი განათლების ჩამოყალიბების პროცესში.
მეორე მოხსენებით - „ივანე ჯავახიშვილი საბჭოთა სამსჯავროზე“ - სემინარზე წარდგა ისტორიის დოქტორი ლევან ჯიქია, რომელიც საქართველოს სახელმწიფო არქივსა და სოხუმის სახელმწიფო უნივერსიტეტს წარმოადგენს. მოხსენება შეეხებოდა ივანე ჯავახიშვილის ცხოვრებისა და საქმიანობის ერთ მნიშვნელოვან ისტორიულ კონტექსტს.
საიუბილეო სემინარი მიეძღვნა ივანე ჯავახიშვილის 150 წლისთავს და მიზნად ისახავდა მისი სამეცნიერო, საგანმანათლებლო და ეროვნული მნიშვნელობის კიდევ ერთხელ წარმოჩენას აკადემიური საზოგადოების წინაშე. ღონისძიებამ გააერთიანა უნივერსიტეტის წარმომადგენლები და ისტორიის სფეროთი დაინტერესებული აუდიტორია საერთო საგანმანათლებლო და სამეცნიერო თემის ირგვლივ.