სოხუმის სახელმწიფო უნივერსიტეტში ნოდარ ჭითანავას სახელობის აუდიტორია გაიხსნა, აკადემიკოსი კი უნივერსიტეტის მედლით დაჯილდოვდა

2026 წლის 19 ივნისს სოხუმის სახელმწიფო უნივერსიტეტში აკადემიკოს ნოდარ ჭითანავას სახელობის აუდიტორია გაიხსნა. ამავე ღონისძიებაზე გამორჩეული სახელმწიფოებრივი, სამეცნიერო, პედაგოგიური და საზოგადოებრივი მოღვაწეობისთვის აკადემიკოსი ნოდარ ჭითანავა სოხუმის სახელმწიფო უნივერსიტეტის მედლით დაჯილდოვდა.

აუდიტორიის გახსნას წინ უძღოდა ბატონი ნოდარ ჭითანავას მოხსენება, რომელშიც მან ქვეყნის სოციალურ-ეკონომიკური განვითარების, სოფლისა და მიწის რესურსების ეფექტიანი გამოყენების, რეგიონული განვითარების და სახელმწიფოს პასუხისმგებლიანი ეკონომიკური პოლიტიკის მნიშვნელობაზე ისაუბრა.

ღონისძიებაზე აკადემიკოს ნოდარ ჭითანავას მიესალმნენ სოხუმის სახელმწიფო უნივერსიტეტის რექტორი, პროფესორი თეა ჯუღელი, უნივერსიტეტის ადმინისტრაციის ხელმძღვანელი, პროფესორი დავით ჯალაღონია და ივანე ჯავახიშვილის სახელობის თბილისის სახელმწიფო უნივერსიტეტის პროფესორი თეიმურაზ შენგელია. მათ ისაუბრეს ბატონი ნოდარის მრავალწლოვან ღვაწლზე, მის განსაკუთრებულ როლზე ქვეყნის სახელმწიფოებრივ, სამეცნიერო და საგანმანათლებლო ცხოვრებაში და მადლობა გადაუხადეს ცოდნის, გამოცდილებისა და ქვეყნისადმი ერთგული სამსახურისთვის.

ნოდარ ჭითანავა დაიბადა 1936 წლის 10 მარტს ზუგდიდის რაიონის სოფელ ჭკადუაშში. 1954 წელს დაამთავრა წალენჯიხის საშუალო სკოლა ვერცხლის მედალზე, შემდეგ კი სწავლა განაგრძო საქართველოს პოლიტექნიკურ ინსტიტუტში, სადაც ინჟინერ-მშენებლის კვალიფიკაცია მიიღო. შემდგომ წლებში მან დაამთავრა უმაღლესი პარტიული სკოლა ფილოსოფიისა და პოლიტიკური ეკონომიის განხრით, დაიცვა საკანდიდატო და სადოქტორო დისერტაციები და ეკონომიკურ მეცნიერებათა დოქტორის სამეცნიერო ხარისხი მოიპოვა.

ბატონი ნოდარი არის პროფესორი, საქართველოს სოფლის მეურნეობის მეცნიერებათა აკადემიის ნამდვილი წევრი - აკადემიკოსი. მისი სამეცნიერო ინტერესები უკავშირდება საქართველოს ეკონომიკის ტრანსფორმაციას, აგროსამრეწველო კომპლექსის განვითარებას, რეგიონების სოციალურ-ეკონომიკურ პრობლემებს, მიწის რესურსების რაციონალურ გამოყენებასა და სასოფლო ტერიტორიების მდგრად განვითარებას.

განსაკუთრებით მრავალმხრივია მისი შრომითი გზა. სხვადასხვა დროს იგი იყო საქართველოს სოფლის მეურნეობის მინისტრი, საქართველოს მინისტრთა საბჭოს თავმჯდომარის პირველი მოადგილე, საქართველოს მინისტრთა საბჭოს თავმჯდომარე, საქართველოს სოფლის მეურნეობის, კვების მრეწველობისა და სატყეო მეურნეობის მინისტრი. ასევე იყო საქართველოს უმაღლესი საბჭოსა და საბჭოთა კავშირის უმაღლესი საბჭოს დეპუტატი. განსაკუთრებით აღსანიშნავია, რომ ნოდარ ჭითანავას 1991 წლის 9 აპრილს ხელი აქვს მოწერილი საქართველოს სახელმწიფოებრივი დამოუკიდებლობის აღდგენის აქტზე.

სახელმწიფოებრივ მოღვაწეობასთან ერთად ნოდარ ჭითანავა აქტიურად ეწეოდა სამეცნიერო და პედაგოგიურ საქმიანობას. იგი 137 სამეცნიერო ნაშრომისა და 15 მონოგრაფიის ავტორია. მისი ხელმძღვანელობით დაცულია 29 დისერტაცია, რაც კიდევ ერთხელ უსვამს ხაზს მის მნიშვნელოვან წვლილს ახალგაზრდა მეცნიერებისა და მკვლევრების აღზრდაში.

ბატონი ნოდარის მეცნიერული და სახელმწიფოებრივი აზროვნება ხშირად ხასიათდება როგორც „ეკონომიკური პატრიოტიზმი“ - ხედვა, რომლის მიხედვითაც ეკონომიკა მხოლოდ ბაზრის მექანიზმების ერთობლიობა კი არ არის, არამედ სახელმწიფოს, საზოგადოების, მიწის, რესურსების, ტრადიციებისა და მომავალი თაობების წინაშე პასუხისმგებლობის სისტემაა.

ნოდარ ჭითანავა იმ ადამიანთა რიცხვს მიეკუთვნება, რომლებმაც საკუთარ თავზე გამოსცადეს ორი ეპოქის - საბჭოთა სისტემისა და დამოუკიდებელი საქართველოს - ურთულესი ისტორიული პროცესები. ორივე ეპოქაში იგი ერთნაირი პასუხისმგებლობით, სიყვარულითა და ერთგულებით ემსახურა ქვეყანას. ამიტომაც კოლეგები მას ხშირად უწოდებენ სახელმწიფოებრივი აზროვნების „ცოცხალ არქივს“ და „ხიდს“ წარსულსა და მომავალს შორის.

სოხუმის სახელმწიფო უნივერსიტეტისთვის დიდი პატივია, რომ უნივერსიტეტის ერთ-ერთ აუდიტორიას აკადემიკოს ნოდარ ჭითანავას სახელი ეწოდა. ეს არის პატივისცემა ადამიანისადმი, რომელმაც მთელი ცხოვრება მიუძღვნა ცოდნას, მეცნიერებას, სახელმწიფოსა და სამშობლოს მსახურებას.

ვულოცავთ აკადემიკოს ნოდარ ჭითანავას ამ ღირსეულ აღიარებას და ვუსურვებთ ჯანმრთელობას, დიდხანს სიცოცხლესა და კვლავაც ნაყოფიერ საქმიანობას ქვეყნის საკეთილდღეოდ.