ფაკულტეტის შესახებ

საბუნებისმეტყველო მეცნიერებათა, მათემატიკის, ტექნოლოგიებისა და ფარმაციის ფაკულტეტის მოკლე ისტორია


იხილეთ ფაკულტეტის პრეზენტაცია


მათემატიკისა და კომპიუტერულ მეცნიერებათა, საბუნებისმეტყველო მეცნიერებათა და ჯანდაცვის ფაკულტეტები საქართველოს განათლების, მეცნიერების, კულტურისა და სპორტის მინისტრის 2019 წლის 19 ივლისის №152/ნ ბრძანების საფუძველზე რეორგანიზებულ იქნა საბუნებისმეტყველო მეცნიერებათა, მათემატიკის, ტექნოლოგიებისა და ფარმაციის ფაკულტეტად (ფაკულტეტის დეკანი, ასოც. პროფესორი ნესტან კეკელია). 

ფაკულტეტი აერთიანებს შემდეგ მიმართულებებს: წმინდა მათემატიკა, გამოყენებითი მათემატიკა, ინფორმატიკა, ფარმაცია, ბიოლოგია, ქიმია, გეოგრაფია, ფიზიკა, ბიოსამედიცინო ინჟინერია და ეკოლოგია.

ფაკულტეტზე სწავლება სამ საფეხურზე მიმდინარეობს. ხორციელდება შემდეგი სასწავლო პროგრამები: 

საბაკალავრო პროგრამები: მათემატიკა, კომპიუტერული ტექნოლოგიები, ფიზიკა, ქიმია, ბიოლოგია, გეოგრაფია, ეკოლოგია, ფარმაცია, ბიოსამედიცინო ინჟინერია.

სამაგისტრო პროგრამები: გამოყენებითი მათემატიკა, გამოყენებითი სტატისტიკა, კომპიუტერებისა და ქსელების პროგრამული უზრუნველყოფა, კონსტრუქციული (გამოყენებითი) გეოგრაფია და ბუნების დაცვა, კონდენსირებული გარემოს ფიზიკა, მიკრობიოლოგია, ქიმიური ექსპერტიზა.

სადოქტორო პროგრამები: კომპიუტერული მეცნიერებები, მყარი სხეულების ფიზიკა, გამოყენებითი მათემატიკა, მიკრობიოლოგია.

ზემოთ ჩამოთვლილი პროგრამების რეალიზებას უზრუნველყოფს 53 არჩეული აკადემიური პერსონალი, მათ შორის 9 პროფესორი, 37 ასოცირებული პროფესორი და 7 ასისტენტ–პროფესორი.

საბუნებისმეტყველო მეცნიერებათა, მათემატიკის, ტექნოლოგიებისა და ფარმაციის ფაკულტეტზე ფუნქციონირებს ბოტანიკა-ზოოლოგიის კაბინეტ-ლაბორატორია, გეოგრაფიის კაბინეტი, ბიოლოგიის, ფიზიკის, ქიმია-ფარმაციის ლაბორატორიები.

სოხუმის სახელმწიფო უნივერსიტეტის ისტორია სათავეს იღებს 1932 წლიდან, როდესაც ქ. სოხუმში პედაგოგიური ინსტიტუტი დაარსდა. თავდაპირველად ის ორი ფაკულტეტისაგან შედგებოდა: ფიზიკა-მათემატიკისა და აგრობიოლოგიის. 

ამ ფაკულტეტებზე ფუნქციონირებდა მხოლოდ სამი კათედრა: ფიზიკის, მათემატიკისა და ქიმიის, 1941 წლისთვის კი ინსტიტუტში უკვე იყო 7 ფაკულტეტი.

სწორედ ამ ორი ფაკულტეტის (ფიზიკა-მათემატიკისა და აგრობიოლოგიის) არაერთჯერადი დიფერენციაციისა და ინტეგრაციის შედეგად არის ჩამოყალიბებული საბუნებისმეტყველო მეცნიერებათა, მათემატიკის, ტექნოლოგიებისა და ფარმაციის ფაკულტეტი.

სოხუმის პედაგოგიური ინსტიტუტის დაარსებიდან, მიუხედავად ისტორიული ქარტეხილებისა, დღეისთვის ფაკულტეტი წარმოადგენს საქართველოში ზუსტი და საბუნებისმეტყველო მეცნიერებების სფეროში უმაღლესი განათლების ერთ-ერთ მნიშვნელოვან კერას.

პედაგოგიური ინსტიტუტის ბაზაზე 1979 წელს დაარსდა ა.მ. გორკის სახელობის აფხაზეთის სახელმწიფო უნივერსიტეტი. უნივერსიტეტიდან ქართული ნაწილის გამოყოფამდე (1989 წლის მაისი) ფიზიკა-მათემატიკისა და ბიოლოგია-გეოგრაფიის ფაკულტეტები უზრუნველყოფდნენ სწავლებას მათემატიკის, ფიზიკის, ზოგადტექნიკური დისციპლინების და ფიზიკის, ბიოლოგიის, გეოგრაფიის სპეციალობებზე ქართულ, რუსულ და აფხაზურ ენებზე. 

იმ დროისთვის ფაკულტეტები სრულად უზრუნველყოფილი იყო მატერიალურ-ტექნიკური ბაზით, ფუნქციონირებდა მრავალი სასწავლო და სასწავლო-სამეცნიერო ლაბორატორია.

1989 წლის მაისიდან აფხაზეთის უნივერსიტეტიდან გამოყოფილი ქართული ნაწილი დარჩა მატერიალურ-ტექნიკური ბაზის გარეშე, მაგრამ, სირთულეების მიუხედავად, „სოხუმხელსაწყოს“ ერთ-ერთ კორპუსში განაგრძო ფუნქციონირება.

1992-1993 წლების ცნობილმა მოვლენებმა არაერთი პედაგოგ-მასწავლებლისა და სტუდენტის სიცოცხლე შეიწირა.

1993 წლის 14 ნოემბრიდან თსუ სოხუმის ფილიალი (ხელმძღვანელი - პროფ. ო. ჟორდანია) უკვე დევნილობაში უმძიმეს პირობებში თბილისის საშუალო სკოლების შენობებში იწყებს ფუნქციონირებას.

1997 წლისთვის ბიოლოგია-გეოგრაფიის ფაკულტეტზე ფუნქციონირებდა ოთხი კათედრა. ამავე წელს ბიოლოგია-გეოგრაფიის ფაკულტეტის რეორგანიზაციის შედეგად ჩამოყალიბდა ორი ფაკულტეტი: ბიოლოგიის (ორი კათედრით) და საბუნებისმეტყველო (ოთხი კათედრით). ფაკულტეტზე გაიხსნა ქიმიის ორი ლაბორატორია.

2000 წელს ფიზიკა-მათემატიკის ფაკულტეტის ბაზაზე შეიქმნა ორი ფაკულტეტი: ფიზიკის ფაკულტეტი ორი კათედრით და მათემატიკისა და კომპიუტერულ მეცნიერებათა ფაკულტეტი ოთხი კათედრით.

2005–2009 წწ. იარსება ყველა ზემოთ ჩამოთვლილი, დიფერენცირების შედეგად არსებული, ფაკულტეტების გაერთიანებამ, სახელწოდებით ,,ზუსტ და საბუნებისმეტყველო მეცნიერებათა ფაკულტეტი’’. 2005 წელს შეიქმნა ფარმაციის მიმართულება.

2009 წელს ზუსტ და საბუნებისმეტყველო მეცნიერებათა ფაკულტეტი გაიყო ორ ფაკულტეტად: „მათემატიკისა და კომპიუტერულ მეცნიერებათა“ და „საბუნებისმეტყველო მეცნიერებათა და ჯანდაცვის“.

ყველა წინამობერდ ფაკულტეტს სხვადასხვა დროს ხელმძღვანელობდნენ: დოც. მიხეილ რანეფტი, დოც. ტარას ცხადაია, პროფ. ოთარ გაბისონია, დოც. ისაკ ტაბაღუა, დოც. გივი ჯობავა, დოც. სერგეი ქიშმარია, დოც. ლეონიდ კარბა, პროფ. შოთა ლაშხია, დოც. ანტიფო ფოჩხუა, დოც. იაზბეი ფეიზბა, დოც. ზამო ზარქუა, დოც. გივი ჯობავა, დოც. ვაჟა თოდუა, დოც. რევაზ აბსავა, პროფ. ალექსანდრე მიმინოშვილი, ასოც. პროფ. შოთა ახალაია, დოც. ჯუმბერ ხუბუტია, პროფ. გულნარა ქარჩავა, პროფ. ზურაბ ფაჩულია, ასოც. პროფ. ზურაბ მეშველიანი, პროფ. მალხაზ აშორდია, ასოც. პროფ. მარინა ზარქუა. 



საბუნებისმეტყველო მეცნიერებათა, მათემატიკის, ტექნოლოგიებისა და ფარმაციის ფაკულტეტის დებულება.