2021 წლის 2 აგვისტოს სოხუმის სახელმწიფო უნივერსიტეტის
რექტორმა პროფ. ზურაბ ხონელიძემ ონლაინ რეჟიმში Zoom-ის პლატფორმაზე ეროვნული სამეცნიერო - პრაქტიკული
კონფერენცია - „საერთაშორისო პროექტებისDITECH, ASSET, CURE, DOIT, DARE დისემინაცია და განათლების თანამედროვე პარადიგმები“ - გახსნა.
მისასალმებელ
სიტყვაში რექტორმა ხაზი გაუსვა საერთაშორისო
პროექტების მნიშვნელობას საქართველოში უმაღლესი საგანმანათლებლო სისტემის
ინსტიტუციონალური განვითარების, კურიკულუმის რეფორმისა და სასწავლო
პროცესის სრულყოფისათვის. აღნიშნული
მხარდაჭერა უნივერსიტეტებში ქმნის სამეცნიერო და სასწავლო პროცესის აკადემიურ დონეზე განხორციელების შესაძლებლობებს.
მინდა წარმატება ვუსურვო თქვენს კონფერენციას, რომელიც ხელს უწყობს საერთაშორისო პროექტების
იდეების გავრცელებას და მხარს უჭერს თვისობრივად ახალი იდეების წარმოშობას უნივერსიტეტებში
- აღნიშნა პროფ. ზურაბ ხონელიძემ.
კონფერენციის მონაწილეებს მიესალმნენ და წარმატებული
სამუშაო დღე უსურვეს სსუ ადმინისტრაციის ხელმძღვანელმა პროფ. ნინო თოფურიძემ, სამეცნიერო
კვლევებისა და განვითარების დეპარტამენტის უფროსმა, ასოც. პროფ. ლია ახალაძემ, განათლების
მეცნიერებათა ფაკულტეტის დეკანმა ასოც. პროფ. თამარ შინჯიაშვილმა, აფხაზეთის ა/რ
მთავრობის თავმჯდომარის მრჩეველმა განათლების ექსპერტმა მანანა ქვაჩახიამ, ივ. ჯავახიშვილის
სახელობის თბილისის სახელმწიფო უნივერსიტეტის პროფესორმა ქეთევან ჭკუასელმა, ამავე
უნივერსიტეტის ასოცირებულმა პროფესორმა საერთაშორისო პროექტების მენეჯერმა იზაბელა
პეტრიაშვილმა და სხვებმა.
კონფერენციის
მუშაობაში მონაწილეობდნენ განათლების მიმართულებით მომუშავე წამყვანი უნივერსიტეტები: ილიას სახელმწიფო უნივერსიტეტი, ივ. ჯავახიშვილის
სახელობის სახელმწიფო უნივერსიტეტი, შოთა რუსთაველის ბათუმის სახელმწიფო უნივერსიტეტი, იაკობ გოგებაშვილის
თელავის სახელმწიფო უნივერსიტეტი, სამცხე-ჯავახეთის სახელმწიფო უნივერსიტეტი, მასწავლებლის პროფესიული განვითარების ცენტრის ჟურნალ „მასწავლებელის“, თბილისის 145-ე, 192-ე,
75-ე, 174-ე საჯარო სკოლები, თელავის მე-7 საჯარო სკოლა, საგარეჯოს
პირველი საჯარო სკოლა და ა. შ.
პლენარული
სექციის გარდა კონფერენციაზე მუშაობდა სექციიები,
რომლებიც ევროკავშირის პროექტების იდეების
დისემინაციას: ახალი ტექნოლოგიებით სწავლების პროცესს, დისტანციური სწავლების გამოწვევებს,
ინტერკულტურულ და მულტიკულტურულ განათლებას, უმაღლეს საგანმანათლებლო სასწავლებლებში
განმავითარებელი შეფასების დანერგვას, განათლების პოლიტიკას, განათლების ინოვაციურ
მეთოდებსა და ახალ პარადიგმებს მიეძღვნა.
თითოეულ სექციის მუშაობა გამოირჩეოდა
ფართო დიკუსიითა და აზრთა გაზიარებით. განსაკუთრებული
მსჯელობის საგანი გახდა აფხაზეთში, გალის მუნიციპალიტეტის სკოლებში ზოგადი და სკოლამდელი განათლების
გამოწვევები, მშობლიურ ენაზე სწავლების პრობლემა,
ენობრივი პრობლემა და საქართველოს უმაღლესი სასწავლებლების ღია სტრატეგია
გალის ახალგაზრდობისადმი.
კონფერენციის შეჯამებისას აღინიშნა მისი
აკადემიური დონე, განსაკუთრებული ყურადღება იქნა გამახვილებული პრაქტიკოს მასწავლებელთა მოხსენებებზე, რეკომენდაციებსა და სამომავლო
კვლევით ორიენტირებზე. სექციის ხელმძღვანელთა
რეკომენდაციით მოხსენებების დიდი ნაწილი უნდა გამოქვეყნდეს, რაც მნიშვნელოვანი თეორიული და პრაქტიკული შენაძენი
იქნება დარგის განვითარებისთვის.
კონფერენცია გაიმართა სამეცნიერო
კვლევებისა და განვითარების დეპარტამენტის, განათლების მეცნიერებათა ფაკულტეტისა
და მულტიკულტურული განათლებისა და კულტურის კვლევების ცენტრის ინიციატივით.