სოხუმის სახელმწიფო უნივერსიტეტში გაიმართა შეხვედრა ქართველ პოეტთან, მწერალთან, დრამატურგთან და საზოგადო მოღვაწესთან, გურამ ოდიშარიასთან.
შეხვედრის ფარგლებში სტუმარმა ისაუბრა საკუთარ შემოქმედებით გზაზე, ლიტერატურის როლზე საზოგადოებრივ ცხოვრებაში, თანამედროვე პროცესებსა და იმ მნიშვნელოვან თემებზე, რომლებიც მჭიდროდ უკავშირდება საქართველოს უახლეს ისტორიას, აფხაზეთსა და ადამიანურ ურთიერთობებს.
გურამ ოდიშარიამ სტუდენტებსა და დამსწრე საზოგადოებას გაუზიარა საკუთარი ხედვები კულტურის, სიტყვის ძალის, ეროვნული მეხსიერებისა და ადამიანური კავშირების შესახებ. შეხვედრაზე განსაკუთრებული ადგილი დაეთმო აფხაზეთის თემას - როგორც ისტორიულ ტკივილს, კულტურულ მეხსიერებასა და დიალოგისთვის აუცილებელ სივრცეს.
ღონისძიება ინტერაქტიულ ფორმატში წარიმართა. აუდიტორიას შესაძლებლობა ჰქონდა, სტუმრისთვის კითხვები დაესვა და მასთან ერთად ემსჯელა ლიტერატურის, საზოგადოებრივი პასუხისმგებლობის, მშვიდობის, თანაცხოვრებისა და ადამიანური ურთიერთობების მნიშვნელობაზე.
შეხვედრას ესწრებოდნენ სოხუმის სახელმწიფო უნივერსიტეტის სტუდენტები, აკადემიური და ადმინისტრაციული პერსონალი და ლიტერატურით, კულტურითა და საზოგადოებრივი ცხოვრებით დაინტერესებული პირები.
მსგავსი შეხვედრები უნივერსიტეტისთვის მნიშვნელოვანია, რადგან ისინი სტუდენტებს აძლევს შესაძლებლობას, უშუალოდ შეხვდნენ თანამედროვე ქართული კულტურის მნიშვნელოვან წარმომადგენლებს და ლიტერატურის საშუალებით კიდევ ერთხელ გაიაზრონ ისტორიისა და ადამიანური დიალოგის მნიშვნელობა.